हसिनाको आरोप अमेरिकामाथि !

अभूतपूर्व जनआन्दोलनका कारण अप्रत्यासित रुपमा सत्ताच्यूत बनेकी तथा यतिखेर भारतमा शरण लिइरहेकी बांग्लादेशकी पूर्व प्रधानमंत्री शेख हसीनाले आफूलाई सत्ताबाट हटाउन अमेरिकाको भूमिका रहेको संकेत गरेकी छिन् । उनले अमेरिकालाई सेन्ट मार्टिन टापु सुम्पेर समग्र बङ्गालको खाडीमा उसके प्रभुत्व स्थापित गर्न नदिएवापत आफू सत्ताबाट हट्न परेको बताउँदै बगलादेशी नागरिकहरुलाई कट्टरपन्थीहरुको बहकाउमा नपर्न चेतावनी दिएकी छिन् ।

आफ्ना निकटस्थहरुलाई पठाएको एक सन्देशमा हसिनाले ‘उनीहरुले विद्यार्थीहरुको लाशको चाङमाथि टेकेर सत्तामा आउन चाहेको तर आफूले त्यो नचाहेर राजीनामा दिएको उल्लेख गर्दै आफूले अमेरिकालाई सेन्ट मार्टिन टापुको सार्वभौमसत्ता सुम्पेको भए आफू सत्तामा रहिरहने’ उल्लेख गरेकी छिन् ।

आफूले मुलुकभित्र बसेकी भए अरु थुप्रैको ज्यान जाने तथा थप भौतिक क्षति हुने अवस्था अउने हसिनाको दावी थियो । आफूले निर्वासनमा जाने कठीन निर्णय लिएको बताउँदै हसिनाले भनेकी छिन्, तपाईंहरुले चुनेका कारण म नेता बनेंऽ तपाईहरु मेरो शक्ति हुनुहुन्थ्यो ।’

थुप्रै नेताहरुको हत्या भएको, कार्यकर्ताहरुलाई उत्पीडन गरिएको तथा तिनका घरहरु जलाइएको खबरले आफ्नो मन रोएको उल्लेख गर्दै हसिनाले भनेकी छिन्– अल्लाहको कृपाले म चाँडै फर्कनेछु । अवामी लिग पटक पटक उठेको छ । म सधैं बङ्गलादेशको भविष्यको लागि प्रार्थना गर्छु ।’

उनले आन्दोलनकारीहरुलाई भनेकी छिन्, मैले तपाईंहरुलाई कहिल्यै रजाकार भनेकी छुइनँ । मलाई बदनाम गर्न मेरा भनाइहरु बङ्ग्याइए । म तपाईंहरुलाई पूरै भिडियो हेर्न अनुरोध गर्छु ।’

पछिल्लो आन्दोलन चर्किनुअघि पनि हसिनाले गत अप्रिलमा सदनमा अमेरिकाले आफूलाई सत्ताच्यूत गर्ने रणनीति बनाइरहेको जनाएकी थिइन् ।

हसिनाको अवामी लिगका वरिष्ठ नेताहरु पनि अमेरिकालाई नै दोष दिने गरेका छन् । गत मे महिनामा बङ्गलादेश भ्रमणमा अएको एक वरिष्ठ अमेरिकी कुटनीतिज्ञ अहिलेको स्थितिका लागि जिम्मेवार रहेको उनीहरु बताउँछन् । गत जुलाईमा बङ्गलादेशमा आफ्नो कार्यकाल पूरा गरेका अमेरिकी राजदूत पिटर हसले पनि बङ्गलादेशको नेशनल पार्टीलाई खुलेआम समर्थन जनाएका थिए ।

समाचार स्रोत: द इकोनोमिक टाइम्स

image: https://th-i.thgim.com