जीतको खुसीमा गधालाई गुलाब जामुन खुवाइयो...

राजस्थानको सिरोही जिल्लामा भारतीय जनता पार्टी (भाजपा) का एक नेताले निकै अनौठो तरिकाले विजय उत्सव मनाएका छन्। बंगाल चुनावमा पार्टीको जितको खुसीयालीमा भाजपा नेता वीरेन्द्र सिंह चौहानले आफ्नो एउटा रोचक संकल्प पूरा गर्दै गधाहरूलाई ११ किलो गुलाब जामुन खुवाएका हुन्।

यस्तो छ पूरा घटना:

पश्चिम बंगालको चुनावी नतिजा सार्वजनिक भएपछि जताततै उत्सवको माहोल थियो। तर, सिरोहीका भाजपा नेता वीरेन्द्र सिंह चौहानले भने अलि फरक बाटो रोजे। उनले चुनाव अघि नै एउटा भाकल गरेका थिए– बंगालमा भाजपाको जित भयो भने समाजमा सबैभन्दा अपहेलित मानिने प्राणी 'गधा' लाई मिठाई खुवाउने।

मंगलवार पार्टीको जित सुनिश्चित हुनासाथ चौहान 'पशु सेवा संस्था' (PFA) पुगे र त्यहाँ उपचार गराइरहेका गधाहरूलाई ११ किलो तौलिएर ल्याइएको गुलाब जामुन खुवाएर आफ्नो भाकल पूरा गरे।

किन गधा नै रोजियो त?

चौहानका अनुसार यो केवल रमाइलोका लागि गरिएको काम होइन, यसको पछाडि एउटा गहिरो विचार छ। उनले भने, "भाजपाको मूल विचारधारा 'अन्त्योदय' हो, जसको अर्थ समाजको अन्तिम पङ्क्तिमा रहेकाहरूको सम्मान गर्नु हो। गधालाई समाजमा सधैं उपेक्षा गरिन्छ, त्यसैले यी बेजुबान जनावरहरूको सेवा गरेर खुसी साट्नु नै वास्तविक उत्सव हो।"

सिरोहीको यो अनौठो उत्सव अहिले राजस्थानभरि चर्चाको विषय बनेको छ। उक्त अवसरमा चौहानसँगै निबाराम देवासी, जब्बर सिंह चौहान लगायतका अन्य कार्यकर्ताहरूको पनि उपस्थिति रहेको थियो ।

स्रोत: नवभारत टाइम्स