बन्धु र शर्मालाई राजेन्द्र सुवेदी स्मृति पुरस्कार: योगमाया सम्मान प्रदान

राजेन्द्र सुवेदी स्मृति समाजले वि.सं. २०८२ सालको राजेन्द्र सुवेदी स्मृति साहित्य पुरस्कार वरिष्ठ समालोचक प्रा.डा.चूडामणि बन्धुलाई प्रदान गर्ने निर्णय गरेको छ ।

नेपाली साहित्यको समालोचना, भाषाविज्ञान, अनुसन्धान तथा लोकसाहित्यका क्षेत्रमा प्राडा बन्धु लामो समयदेखि साधनारत छन् ।

त्यसै गरी सोही वर्षको राजेन्द्र सुवेदी स्मृति कला पुरस्कार वरिष्ठ अभिनेत्री शकुन्तला शर्मा गुरुङलाई प्रदान गरिने भएको छ । लामो समयदेखि नेपाली रङ्गमञ्च र चलचित्रका क्षेत्रमा अभिनयका माध्यमबाट गुरुङले योगदान गर्दै आएका छन् । समाजका अध्यक्ष प्रा.डा. जीवेन्द्रदेव गिरीको अध्यक्षतामा बसेको समाजको वैठकले सो निर्णय गरेको हो । आगामी साउन महिनामा स्व. सुवेदीको जन्म जयन्तीको अवसर पारेर प्रदान गरिने दुवै पुरस्कारको राशी २२,२२२।— रहेको छ ।

योगमाया पुरस्कार

नेपाल स्रष्टा समाजले वि.सं. २०८३ सालका लागि ‘योगमाया राष्ट्रिय नारी स्रष्टा सम्मान’ साहित्यकार माया ठकुरीलाई तथा ‘योगमाया न्यौपाने अभियन्ता राष्ट्रिय सम्मान’ समालोचक निनु चापागाईँलाई प्रदान गरेको छ ।

योगमाया स्मृति दिवसका अवसरमा असार २२ गते राजधानीमा आयोजित कार्यक्रममा उक्त सम्मान प्रदान गरिएको हो ।

नेपाली इतिहासकी विद्रोही तथा क्रान्तिकारी व्यक्तित्व योगमायाको स्मृतिमा स्थापित यी सम्मानहरू हरेक वर्ष अर्पण गरिँदै आएका छन् । दुवै सम्मानको नगद राशि ५० हजार १ सय ११ रुपैयाँ रहेको छ ।