पाब्लो पिकासोको जीवनसँग जोडिएको एउटा रोचक मिथक

विश्वविख्यात चित्रकार पाब्लो पिकासोका बारे धेरै कहानी कथाहरु चर्चित छन् । तीमध्ये कतिपय कुराहरु सत्य पनि हुन सक्छन् भने कतिपय चाहिँ उनको प्रसिद्धिले सिर्जना गरेको मिथक मात्रै पनि । त्यस्तै एउटा मिथक– उनले खाली  गोली भएको रिभल्वर बोक्ने गर्थे रे भन्ने पनि हो । त्यस मिथक अनुसार पिकासो आफूलाई आफ्नो चित्रकलाको अर्थ सोध्ने मानिसहरूतर्फ सो रिभल्वर तेर्स्याउने गर्थे भन्ने पनि हो । यो मिथक मात्रै हो भनेर भन्ने आधार के हो भने उनले त्यसो गर्थे भन्ने कुरा प्रमाणित गर्ने कुनै ठोस प्रमाण छैन। वास्तवमा यो कथा पिकासोको विलक्षण र उत्तेजक व्यक्तित्वसँग सम्बन्धित मिथकको रूपमा विकसित भएको देखिन्छ, वास्तविक तथ्यको रूपमा होइन।

वास्तवमा पिकासोसँग सम्बन्धित यो मिथकलाई कला प्रतिरोधको प्रतीकको रुपमा लिने गरिन्छ । भनिन्छ, पिकासो आफ्नो चित्रकलाको अर्थ गहिरो रूपमा विश्लेषण गर्नेसँग असहमति जनाउँथे र आफ्नो कलालाई कुनै निश्चित व्याख्यामा सीमित गर्ने प्रयासको विरोध गर्थे। कतिपयको भनाइमा चाहिँ यो कथा पिकासोको यस निराशालाई प्रतीकात्मक रूपमा प्रस्तुत गर्न विकसित भएको हुन सक्छ।

सांस्कृतिक सन्दर्भमा पनि यस खालको मिथकलाई हेर्ने र बुझ्ने गरिन्छ ।  पिकासोको युगमा, त्यस्ता कलाकारहरू तथा तिनका समर्थकहरुले प्रसिद्धि कमाएका कलाकारको व्यक्तित्वलाई ठूलो रूपमा देखाउन खोज्थे। त्यसक्रममा कहिलेकाहीँ अतिरञ्जित कथा वा प्रतीकात्मक क्रियाकलापहरू उनीहरूलाई विद्रोही स्वभावको रूपमा चित्रण गर्न प्रयोग गरिन्थ्यो।

त्यसो त  पिकासो निश्चय नै असामान्य स्वभावका व्यक्ति थिए र उनमा विलक्षणको प्रतिभा थियो । तथापि उनले कलाको मर्म सोध्न खोज्न चाहने मानिसहरूप्रति रिभल्वर नै तेर्स्याउने गर्थे भन्ने कथा नाटकीय अतिरञ्जनझैं देखिन्छ।

पिकासो विश्वविख्यात कलाकारहरु हुन् र उनको जीवनका थुप्रै घटनाक्रमहरुलाई व्यापक रूपमा दस्तावेजीकरण गरिएको छ। तर, यो घटनालाई प्रमाणित गर्ने कुनै ऐतिहासिक अभिलेख वा विश्वासयोग्य प्रमाणहरु उपलब्ध छैन। तर यो कथा सत्य होस् वा नहोस्, पिकासोले कलाको अर्थलाई कठोर रूपमा व्याख्या गर्न खोज्नेहरूप्रति असन्तुष्टि व्यक्त गर्ने गर्थे। उनको एउटा भनाइ निक्कै प्रसिद्ध पनि छ: "Everyone wants to understand art. Why not try to understand the song of a bird?" उनको यो भनाइले  कला भावनात्मक र व्यक्तिगत अनुभवका लागि हो, न कि तार्किक व्याख्याका लागि हो भन्ने सन्देश दिन्छ ।