“भेनेजुएला फेरि कहिल्यै उपनिवेश बन्ने छैन”

पाब्लो मेरिगुएत

अमेरिकी राष्ट्रपति डोनाल्ड ट्रम्पले फेरि एकपटक भेनेजुएलाविरुद्ध आक्रामक अभिव्यक्ति दिएका छन्। आर्थिक प्रतिबन्धहरूको शृंखला र क्यारिबियन सागर क्षेत्रमा १५,००० भन्दा बढी सैनिक तथा युद्धपोत तैनाथ गरिसकेपछि, ट्रम्पले निकोलास मादुरोको सरकारलाई आर्थिक रूपमा घाँटी अठ्याउने थप कदम चाल्ने निर्णय गरेका छन्।

“आफ्नो तेल फिर्ता लिने?”: ट्रम्पको विवादास्पद भनाइहरू

ह्वाइट हाउसले हप्तौँदेखि भेनेजुएलामाथि लगाइएका प्रतिबन्ध र आक्रमणको धम्कीलाई अन्तर्राष्ट्रिय लागु पदार्थ तस्करी सञ्जालको प्रमुख केन्द्र भएको आरोप लगाउँदै आएको छ। तर नौसैनिक नाकाबन्दीको निर्णयको पछाडि भने फरक उद्देश्य देखिन्छ। ट्रम्पले “प्रतिबन्धित सबै तेल ट्यांकरमाथि पूर्ण र सम्पूर्ण नाकाबन्दी” लागू गर्ने घोषणा गर्दै, आफ्नो दाबीअनुसार संयुक्त राज्य अमेरिकाको स्वामित्वमा पर्ने स्रोतहरू “फिर्ता लिने” उद्देश्य रहेको बताएका छन्।

“अमेरिकाले अपराधीहरू, आतंकवादीहरू वा अन्य कुनै पनि देशलाई हाम्रो राष्ट्रलाई लुट्न, धम्क्याउन वा क्षति पुर्‍याउन दिने छैन, र त्यस्तै गरी शत्रुतापूर्ण शासनलाई हाम्रो तेल, जमिन वा अन्य कुनै पनि सम्पत्ति कब्जा गर्न पनि दिने छैन। यी सबै तुरुन्तै संयुक्त राज्य अमेरिकालाई फिर्ता गरिनुपर्छ,” ट्रम्पले ट्रुथ सोसलमा लेखेका छन्।

ट्रम्पले धम्की दिँदै भने, “भेनेजुएला दक्षिण अमेरिकाको इतिहासमै सबैभन्दा ठूलो नौसैनिक शक्तिले पूर्ण रूपमा घेरिएको छ। यो अझै ठूलो हुँदै जानेछ, र त्यसको धक्का उनीहरूले पहिले कहिल्यै अनुभूत नगरेको जस्तो हुनेछ, जब सम्म उनीहरूले हामीबाट पहिले चोरी गरेका सबै तेल, जमिन र अन्य सम्पत्तिहरू संयुक्त राज्य अमेरिकालाई फिर्ता गर्दैनन्।”

ट्रम्पले थप घोषणा गरे, “हाम्रा सम्पत्तिहरूको चोरी र आतंकवाद, लागु पदार्थ तस्करी तथा मानव तस्करीलगायतका धेरै कारणहरूका आधारमा भेनेजुएलाको शासनलाई ‘विदेशी आतंकवादी संगठन’को रूपमा घोषणा गरिएको छ।”

यो घोषणा अमेरिकी सेनाले क्युबातर्फ जाँदै गरेको भेनेजुएलाली तेल ट्यांकर कब्जा गरेको एक हप्तापछि आएको हो। मादुरो सरकारले यस कदमलाई “अन्तर्राष्ट्रिय समुद्री डकैतीको कार्य” भन्दै संयुक्त राष्ट्रसंघमा कडा विरोध दर्ता गराएको छ।

“हस्तक्षेपवाद र साम्राज्यवाद,” कराकासको टिप्पणी

भेनेजुएलाली अधिकारीहरूले ट्रम्पको घोषणालाई “घिनलाग्दो धम्की” भन्दै यसको कडा आलोचना गरेका छन् र यसले अन्तर्राष्ट्रिय कानुन, स्वतन्त्र व्यापार तथा नौसञ्चारको स्वतन्त्रताको उल्लङ्घन गरेको बताएका छन्। उनीहरूले ट्रम्पले “आफ्नो सामाजिक सञ्जालमार्फत भेनेजुएलाको तेल, जमिन र खनिज सम्पत्ति आफ्नो निजी सम्पत्ति हो भन्ने दाबी गरेको” र “त्यसैले भेनेजुएलाले तुरुन्तै आफ्ना सबै सम्पत्ति सुम्पनुपर्ने” आशय व्यक्त गरेको आरोप लगाएका छन्।

यसै वक्तव्यमा थप भनिएको छः “भेनेजुएला र अमेरिकाका जनताले ठूलो जनप्रदर्शनमार्फत जसको भण्डाफोर गरिसकेका छन्, [ट्रम्पको कदमको] वास्तविक उद्देश्य सधैं नै झूट र हेरफेरका विशाल अभियानमार्फत देशको तेल, जमिन र खनिजमाथि कब्जा जमाउनु नै रहेको छ।”

वक्तव्यअनुसार, भेनेजुएलाले यो घटनाबारे आफ्ना राजदूतमार्फत संयुक्त राष्ट्रसंघमा उजुरी दर्ता गर्नेछ। साथै, अमेरिकी जनता र विश्वका अन्य सबैलाई पनि यो कदम अस्वीकार गर्न आह्वान गरिएको छ, “जसले दक्षिण अमेरिकाको मुक्तिदायी सेनालाई जन्म दिएको देशको सम्पत्ति चोर्ने डोनाल्ड ट्रम्पको वास्तविक मनसायलाई फेरि एकपटक उजागर गर्छ… भेनेजुएलाका जनता सेना र प्रहरीसँग पूर्ण एकतामा रहेर आफ्ना ऐतिहासिक अधिकारहरूको रक्षा गर्नेछन् र शान्तिपूर्ण माध्यमबाट विजय हासिल गर्नेछन्।”

कराकासले स्पष्ट रूपमा घोषणा गर्‍योः “भेनेजुएला अब कहिल्यै कुनै साम्राज्य वा विदेशी शक्तिको उपनिवेश बन्ने छैन, र आफ्ना जनतासँग मिलेर समृद्धि निर्माण गर्ने तथा स्वतन्त्रता र सार्वभौमिकताको रक्षा गर्ने मार्गमा निरन्तर अघि बढिरहनेछ।”

संयुक्त राज्यभित्र भेनेजुएलासँगको युद्धविरुद्धको विरोध बढ्दो

यसबीच, ट्रम्पको निर्णयको निन्दा अमेरिकाभित्र पनि हुन थालेको छ। कंग्रेसम्यान जोआक्विन कास्त्रोले भने, “नौसैनिक नाकाबन्दी निस्सन्देह युद्धको कार्य हो, त्यस्तो युद्ध जसलाई कंग्रेसले कहिल्यै अनुमोदन गरेको छैन र अमेरिकी जनताले पनि चाहेका छैनन्।”

कास्त्रोले थपे कि आफू, अमेरिकी प्रतिनिधि जिम म्याकगभर्न र प्रतिनिधि थोमस म्यासीले राष्ट्रपति ट्रम्पलाई “भेनेजुएलासँगका शत्रुतापूर्ण गतिविधि अन्त्य गर्न” आह्वान गर्ने प्रस्ताव प्रतिनिधि सभामा पेश गर्नेछन्। उनले भने, “प्रतिनिधि सभाका प्रत्येक सदस्यलाई अमेरिकी नागरिकहरूलाई फेरि अर्को शासन परिवर्तनको युद्धतर्फ पठाउने पक्षमा छन् कि छैनन् भन्ने निर्णय गर्ने अवसर हुनेछ।”
(नोट- जिम म्याकगभर्नले अमेरिकी प्रतिनिधि सभामा भेनेजुएला बिरुद्ध गतिविधि रोक्न राखेको प्रस्ताव झिनो मतले पराजित भएको छ )

यसै क्रममा, पार्टी फर सोसलिज्म एन्ड लिबरेसन (PSL) ले पनि नाकाबन्दीको विरोध गर्दै र यसलाई युद्धको कार्यको रूपमा निन्दा गर्दै एक वक्तव्य जारी गरेको छ। वक्तव्यमा भनिएको छः
“आफ्नो प्रशासनको पछिल्लो युद्ध निम्त्याउने कदमका रूपमा डोनाल्ड ट्रम्पले भेनेजुएलामाथि नौसैनिक नाकाबन्दीको आदेश दिएका छन्। यसको घोषित उद्देश्य तेलबाट आउने सम्पूर्ण आम्दानी रोक्नु हो, ताकि एक स्वतन्त्र देशको सरकारलाई गैरकानुनी रूपमा अपदस्थ गर्न सकियोस्। यो नाकाबन्दी अर्थतन्त्र तहसनहस पार्ने र मानवीय सङ्कट सिर्जना गर्ने उद्देश्यले गरिएको घेराबन्दी हो, जुन संयुक्त राज्य अमेरिकाद्वारा सम्पूर्ण युद्ध थाल्नुअघि तयार पारिएको चरण हो। यो आक्रमण भेनेजुएलाको तेल नियन्त्रणमा लिने र त्यसको राजनीतिक स्वतन्त्रतालाई उल्ट्याउने प्रयत्नसँग सम्बन्धित छ। यो ल्याटिन अमेरिकामा अमेरिकी हस्तक्षेपको पुरानै ढाँचाको निरन्तरता हो, जहाँ अमेरिकी नियन्त्रणको विरोध गर्ने सरकारहरूलाई शासन परिवर्तनको निशाना बनाइन्छ।”

पार्टी फर सोसलिज्म एन्ड लिबरेसनका अनुसार - “ट्रम्पले भेनेजुएलाको जमिन, तेल र खनिज पदार्थ चोर्ने अमेरिकी योजनाबारे खुलेर बोलेर आफ्ना उपनिवेशवादी मनसाय स्पष्ट गरिसकेका छन्। अमेरिकाका जनताले भेनेजुएलामाथि सैन्य हस्तक्षेपको व्यापक रूपमा विरोध गरेका छन्। यो युद्ध, इराकविरुद्धको युद्धझैँ, झूटा बहानाहरू र साम्राज्यवादी महत्वाकाङ्क्षामा आधारित छ। यो नाकाबन्दी रोक्न र ठूलो युद्ध फैलिन नदिन हामीले संगठित भई जनआन्दोलन गर्नुपर्छ। भेनेजुएलाविरुद्ध कुनै पनि युद्ध स्वीकार्य छैन।”

Source: https://peoplesdispatch.org