लास
साउन १, २०८२ बिहिबार ०७:३८
लासहरु कफन जस्तै अभिनय गर्दैनन् !
मलाई अचेल लासहरु मनपर्छन्
लासहरु आफू जे होइन त्यो हुनुको अभिनय गर्दैनन् ।
मलाई अचेल लासका मनमुखहरु मनपर्छन्
लासका मनमुखहरु समानान्तरमा चल्छन् ।
मलाई अचेल लासका मुटु र ओठहरु मनपर्छन्
लासका मुटुहरुले फूल टिप्दै
लासका ओठहरुले फूल चुम्ने अभिनय गर्दैनन् ।
मलाई अचेल लासका आँखाहरु मनपर्छन्
लासका आँखाहरु
आँखाभित्र पर्खाल लुकाएर
आँखाबाहिर आकाश देखाउने अभिनय गर्दैनन् ।
मलाई अचेल लासका खुट्टाहरु मनपर्छन्
लासका खुट्टाहरु पैतलामुनी फूल राखेर
पैतालाबाहिर बगैचा बनाउने अभिनय गर्दैनन् ।
मलाई अचेल लासका टाउकाहरु मनपर्छन्
लासका टाउकाहरु
टाउकोभित्र पिँजडा राखेर
टाउकोबाहिर आकाश छुने अभिनय गर्दैनन् ।
मलाई अचेल लासका हातहरु मनपर्छन्
लासका हातहरु माछालाई नै ढढिया थापेर
माछालाई नै आकाश देखाउने अभिनय गर्दैनन् ।
मलाई अचेल लासका हातहरु अति मनपर्छन्
लासका हातहरु चरालाई नै पासो थापेर
चारालाई नै आकाश देखाउने अभिनय गर्दैनन् ।
मलाई अचेल लासका हातहरु मनपर्छन्
लासका हातहरु देशमा डडेलो लाएर
देशमा दमकल चलाउने अभिनय गर्दैनन् ।
हो लासहरु यस्तै हुन्छन्
लासहरु चिरनिन्द्रामा सुतेर
जिउँदो हुनुको अभिनय गर्दैनन् ।
लासहरु मृत्यु जस्तै तथ्य हुन्
तथ्यहरु अभिनय गर्दैनन् ।
प्रतिक्रिया