चौतारीको कम्युनिस्ट
माघ २६, २०८१ शनिबार ०३:५३
ऊ भन्छ
हाम्रो सपना एउटै हो गन्तव्य एउटै हो!
तर...
तर ऊ हिँड्दैन!
बस्छ चौतारिमा
पेल्दै ज्ञान र गफ
चौतारीमा
ऊ भन्छ
हाम्रो सपना एउटै हो गन्तव्य एउटै हो!
उसले अनेक कुरा चलाउँछ!
हल्ला चलाउँछ, चिया गफ चलाउँछ
क्याम्पस प्रशासन चलाउँछ
घाउ चलाउँछ, घाइते चलाउँछ
ऊ मोबाइल निकै राम्रो चलाउँछ!
कस्तो मिठो मिठो पो लेख्छ
उसले चलाउन नजानेको त
सिर्फ कलम, हसिया अनि बन्दुक हो।
ऊ उपत्यका भित्र सजिलै पाइने
कम्युनिस्ट नामक जिनिस हो।
बिचरा आन्दोलनप्रति इमान्दार छु भन्छ।
तर...
ऊ हिँड्दैन!
बस्छ फेर्छु राज्यसत्ता भन्दै
बिज्ञानसंगत मोबाइलबाटै
पेल्दै ज्ञान र गफ
मोबाइलबाटै
ऊ भन्छ– हाम्रो सपना एउटै हो गन्तव्य एउटै हो!!
प्रतिक्रिया