सुरक्षा निकायको निगरानीमा ३०० माओवादी

सुरक्षा निकायले चार वरिष्ठ कमान्डर सहित करिब ३०० माओवादीहरूलाई आफ्नो कडा निगरानीमा राखेको छ। भारत सरकारले मार्च २०२६ सम्ममा नक्सलवादलाई पूर्ण रूपमा उन्मूलन गर्ने समयसीमा तोकेको छ । त्यसलाई पूरा गर्न सुरक्षा बलले अहिले आफ्नो कारबाहीलाई तीव्र बनाएको सुरक्षा अधिकारीहरूले बुधबार जानकारी दिएका छन्।

त्यसरी निगरानीमा पर्नेहरुमा प्रतिबन्धित भारतीय कम्युनिष्ट पार्टी (माओवादी) का शीर्ष चार केन्द्रीय समिति सदस्यहरूमा मिसिर बेसरा (उर्फ भास्कर), देवजी (उर्फ कुम्भा दादा उर्फ चेतन), रमण (उर्फ गणपथी उर्फ लक्ष्मण राव) र मल्लाह राजा रेड्डी (उर्फ सागर) समेत  रहेका छन्।

गुप्तचर निकायबाट प्राप्त सूचनाका आधारमा देवजी र उनका दोस्रो कमान्डर केसा सोधी त्यस क्षेत्रमा रहेको खबर पाएपछि मंगलबार छत्तीसगढ-तेलंगाना सीमामा ठूलो सैन्य कारबाही सुरु गरिएको थियो।

अधिकारीहरूका अनुसार, ओडिसामा लुकेर बसेको भनिएका रेड्डी बाहेक अन्य सबै वरिष्ठ कमान्डरहरू यसै क्षेत्रमा सक्रिय रहेका छन्। सुरक्षा बलले खोजिरहेका नक्सलवादीहरूमध्ये यी चार वरिष्ठ कमान्डरसहितका करिब ३०० जना अन्तिम समूह हुन्। अधिकारीहरूले कि त उनीहरूले आत्मसमर्पण गर्नुपर्ने, अन्यथा मार्च २०२६ को समयसीमाभित्र सुरक्षा बलले तीव्र अपरेशनमार्फत उनीहरूलाई सिध्याउने बताएका छन्।

गृह मन्त्रालयले अक्टोबर २०२५ मा नक्सलवादबाट अति प्रभावित जिल्लाहरू घटेर तीनवटामा (छत्तीसगढका बीजापुर, सुक्मा र नारायणपुर) सीमित भएको जानकारी दिएको थियो। मन्त्रालयले एक विज्ञप्ति जारी गर्दै नक्सलवादी प्रभावित जिल्लाहरूको संख्या १८ बाट घटेर ११ मा झरेको बताएको छ।

नरेन्द्र मोदी सरकार ३१ मार्च, २०२६ सम्ममा नक्सलवादी समस्यालाई पूर्ण रूपमा उन्मूलन गर्न प्रतिबद्ध रहेको विज्ञप्तिमा उल्लेख गरिएको छ।

स्रोत: https://www.telegraphindia.com