दुई दुना चार = ?

लात्सलो ताबी

मंसिर ७, २०८० बिहिबार ०९:०६

"महोदय, यदि म तपाईंलाई दुई दुना कति हुन्छ भनेर सोधे भने तपाईं के जवाफ दिनुहुन्छ ?"

"चार हुन्छ भनेर म भन्नेछु। दुई दुना चार।'

"तपाईंलाई यसमा पुरा विश्वास छ हैन ?"

"अवश्य ! म आफ्नो ज्यानको बाजी लगाउन पनि तयार छु।"

"ठिक छ। त्यसो भए मेरो अनुरोध छ कि यो कुरा मलाई लेखेर दिनुहोस् न !"

"के लेखेर दिउँ ?"

"यही कुरा कि दुई दुना चार हुन्छ भनेर । कागजको एउटा टुक्रामा लेखेर दिनुहोस् कि मेरो विचारमा दुई-दुना चार हुन्छ। फेरि त्यसमा सही गरेर मिति पनि लेखिदिनु होला। यी लिनुहोस् मेरो नोटबुकको पन्ना यता छ.....। "

"यो तिमीलाई किन चाहियो ?"

"मलाई यस्तै खालका रोचक चिजहरु संकलन गर्ने शोख छ।"

"त्यसो भए यस्तो गर्न बन्द गरिदेऊ !"

"किन नि ? पक्कै पनि तपाईंले मेरो अनुरोधलाई अस्वीकार गर्नुहुन्न ?''

"माफ गर, तिम्रो अनुरोध मुर्खतापूर्ण छ। मानिसहरुले यस्ता चिजहरु जम्मा गर्दैनन्। खैर, जेसुकै होस्, म संग यहा कुनै त्यस्तो चिज छैन, जसले म लेख्न सकुँ।"

"यी लिनुहोस्, मेरो कलम यता छ।"

"म अरुको कलम छुन्न। के थाह कुनै रोग सरिहाल्छ कि !"

"त्यसो भए यो कागजको लागि बेलुका तपाईंको घरमा आउँछु।"

"बेलुका म नाटक हेर्न जादैछु।"

"त्यसो भए म बिहान आउँ ?"

"यदि तिमी बिहानको समयमा आयौ भने म गलहत्याएर निकालिदिन्छु। "

"तर तपाईंलाई आपत्ति के छ ? जब तपाईं दुई दुना चार हुन्छ भनेर आफ्नो ज्यानको बाजी लगाउन तयार हुनुहुन्छ । यही कुरा भन्नु भएको थियो हैन तपाईंले ?

"त्यसो भए त्यसैले काम चलाउ। म लेखेर त दिदै दिन्नँ। बुझ्यौ, तिमीले यो कागज अरुलाई देखाउदैनौ भन्ने के भरोसा छ।"

"देखाए भने पनि के हुन्छ र ? के तपाईंलाई विश्वास छैन सधैं दुई दुना चार हुन्छ भनेर ?"

"मलाई यसमा एक रत्तिभर पनि शंका छैन। "

"अनि ?"

"तैपनि। हेर भाइ, म बालबच्चा वाला मान्छे हुँ र मैले कहिले पनि राजनीतिमा भाग लिएको छैन। "

"अरे यसको राजनीतिसंग के लेना-देना छ र ?"

"यो मलाई थाह छैन। तर बँचेर हिँड्नु नै उपयुक्त हुन्छ। म चाहन्न कि यो कुरा लेखेर दिएवापत भोलि कसैले मलाई नराम्रो भनोस्। "

"कसैलाई थाहापत्तो केही हुँदैन। म आज नै यो कागजलाई ताला लगाएर सुरक्षित पार्छु ।"

"अनि तिम्रो घर फुटाएर चोरी भयो भने ? त्यसबेला म ठुलै संकटमा फस्नेछु। "

" मेरो घर फुटाएर चोरी लाग्यो भने पनि के दुई दुना चार हुन बन्द हुन्छ ?"

"मेरो दिमाग चाट्न छोड। म यो कुरा लेखेर तिमीलाई दिँदै दिन्नँ र अब यो भन्दा अगाडि कुनै कुरा हुन सक्दैन। "

"सुन्नुहोस्, मेरो मनमा एउटा विचार आएको छ। म तपाईंलाई पनि एउटा कागजमा लेखेर दिन्छु कि दुई दुना चार हुन्छ भनेर। त्यस्तो अवस्थामा तपाईंलाई कुनै खतरा हुँदैन। "

"त्यसो गर्नु आवश्यक छैन। तिमी चाहन्छौ भने म यो कुरा लेख्न तयार छु कि आजकल, सामान्य रुपमा अधिकांशत: यही कुरा मानिन्छ कि दुई दुना लगभग चार हुन्छ। यसले काम चल्छ ?"