ओख्ली कमीनी
भदौ १७, २०८१ सोमबार ०२:४६
म ओख्ली कमीनी
कोही मुसल बनाई कुट्छन्
कोही ढीकी बनाई कुट्छन्
सबैले जोत्ने
म ओख्ली कमिनीको जीवनमा
कहिल्यै पनि 'एक दिन' आएन !
भन्छन्,
एक जुगमा एकदिन आयो
तापैताप ल्यायो
त्यो तापले मेरो चीसो चूलो तातो भएन
मेरो चुहिने छानो नचुहिने भएन
मालिक! त्यो एकदिन
मेरो छाप्रोमा किन आएन ?
भन्छन्,
"एक जुगमा एकदिन आयो
उथलपुथल ल्यायो
त्यो उथलपुथलले
भारतका ढावाहरुमा
भाँडा माझिरहेका
मेरा नानीहरुका लागि !
किन एउटा
कापी कलम ल्याएन ?
मालिक त्यो उथलपुथल
मेरो छाप्रोमा किन आएन ?
भन्छन्,
एक जुगमा एकदिन आयो
परिवर्तन ल्यायो
त्यो परिवर्तनले
बम्बैका कोठीहरूमा
आँसु बगाइरहेका
मेरा चेलीहरूका लागि
किन एउटा रुमाल ल्याएन
मालिक ! त्यो परिवर्तन
मेरो छाप्रोमा किन आएन ?
आफ्नो स्याउ मलखाँदोमा थुपारेर
कर्णाली काला पहाडहरूमा भारी बोक्छ
भरिया जुम्ली दाइ
पानी नपाई मर्छ
मालिक ! बग्ने कर्णालीमा
त्यो एकदिन किन आएन ?
नेपालमा कालापानी बस्छ
कालापानीमा भारत बस्छ
नेपालमा महाकाली बग्छ
महाकालीमा भारत बग्छ
मालिक ! बनसाङ्ला धपाउनका लागि
त्यो एकदिन
मेरो देशमा किन आएन ?
मेरो साँध - सीमाना मेरो छैन
मेरो वनपाखा मेरो छैन
मेरो नदीनाला मेरो छैन
मेरो माटो मेरो छैन
मेरो माटोमा
सेतो बाघ ओडार बनाई बसेको छ
मालिक !
ओडार भत्काउने त्यो एकदिन
मेरो देशमा किन आएन ?
किन आएन ?
मेरा प्रश्नहरूको जवाफ
तिम्रो इजलासमा छैन
तिम्रो सदनमा छैन
तिम्रो दरबारमा छैन
तिम्रो कुनै ब्लकमा छैन
म जागें मालिक !
मैले कोल्टे फेरें !
आज रगतमा पाइलाहरू पच्छाउँदै
म ओख्ली कमीनी
रातो घाम खोजिरहेकी छु
म जागें तिम्रो प्रलय मालिक !
म जागें !
हेर त
म ओख्ली कमिनी रातो घाम खाजिरहेछु
बित्ता नापिरहेछु
म जागे
तिम्रो पर्लय मालिक !
म जागे
तिम्रो पर्लय मालिक !
–कालापानीकी द्रौपदी’बाट
प्रतिक्रिया