जुत्ताको नाप
चिनियाँ नीतिकथा
![](https://snowberry.prixacdn.net/media/gallery_folder/jutta%2520ko%2520nap_3haDb1vR8q_puir20sbhyv8pxb0agj1mb5kxxvl4fud9c9zzzp0rf4eddw0ffrh2eyfaa2a_qZDkvKkBdB_pzhacvprie91jekabqbqoewd8ttt1v4v0vngj1jxdjfs9tfjczncwahtwgdx.png)
एकजना मानिस जुत्ता किन्ने विचार गर्दै थियो । बेसीमा हाट बजार लाग्यो । आज जुत्ता किन्छु भन्दै ऊ खाना खाएर बेसीतिर लाग्यो । जुत्ताका पसलहरु देखिए । उत्साहित हुँदै ऊ एउटा पसलमा पस्यो र भन्यो, “मलाई एक जोर जुत्ता चाहिएको छ ।”
पसले जुत्ता झिकेर देखाउँदै थियो ।
“ए मैले जुत्ताको नापो त घरमै बिर्सेर आएछु, धत्तेरी !”
पसलेले के के भन्दै थियो । ऊ केही नसुनी फटाफट घर फर्क्यो । घरमा पुगेर नापो लियो । पुनः बेसी झर्यो । ऊ बेसी पुग्दा हाटबजार उठिसकेको थियो । उसले जुत्ता किन्न पाएन ।
एकजनाले सोध्यो– “तपाईं जुत्ता कसको लागि किन्दै हुनुहुन्थ्यो ?”
“आफ्नै लागि !” उसले भन्यो ।
“त्यसो भए पसलमा पसेर जुत्ता लगाएर हेर्नु भएन ? आफैंलाई जुत्ता किन्न घरबाट नापो ल्याइरहन किन पर्थ्यो र ?”
कुरा सुनेर जुत्ता किन्न खोज्ने मान्छे ट्वाल्ल पर्यो ।
प्रस्तुति: शारदारमण नेपाल
प्रतिक्रिया