मिटरव्याजीले हडपेको घर खाली गराए

सिरहाको लहान नगरपालिका ७ मा मिटर ब्याज बिरुद्धको संघर्ष समितिले  साहु (महाजन)ले हड्पेको घर खाली गराएका छन् ।

साहु रामबाबु महतोले हड्पेको घर खाली गराएर मिटर ब्याज बिरुद्धको संघर्ष समितिले पीडित श्याम विश्वकर्मालाई हस्तान्तरण गरेका हुन् । श्याम दुई छोरा, श्रीमती र भतिजा-भतिजीसहित घर प्रवेश गरेका छन् ।

०७१ मा महतोसँग श्यामका दाइ हिरालालले १० लाख रुपैयाँ ऋण लिएका थिए । ऋण लिन महतोको नाममा १० धुर जग्गा र घर रजिस्ट्रेशन पास गरिदिएका थिए ।ब्याजसहित ऋण‌ चुक्ता गरेपछि घरजग्गा फिर्ता गर्ने सहमति भएको थियो ।

 

तर ऋणी हिरालालको निधन भयो । त्यसपछि उनका भाइ श्यामले पटक पटक गरी २१ लाख रुपैयाँ महतोलाई बुझाए । ०७७ मा महतोले ५७ लाख हिसाब सुनाए र तिर्न नसके घर खाडी गर्न श्यामलाई चेतावनी दिए ।

 

श्याम भन्छन्, ‘चर्को ब्याजसहित रामबाबुले मलाई ५७ लाख तिर्नुपर्ने भन्न थाल्यो । त्यति रकम म तिर्न सकिनँ । पछि धाक धम्की लगाएर घर खाली गर्न लगायो ।’

‘साहु रामबाबुले दुइ वर्ष अगाडि घर कब्जा गरेपछि आफू भाडामा बस्दै आएको थिए’, श्यामले दायित्वबोधलाइ भने, ‘रामबाबुले घर भाडामा लगाएको थियो । भाडामा बस्नेहरूलाई म पटक पटक खाली गर्न भन्दै आएका थियौँ । तर खाली नगरेपछि साथीहरूको सहयोगमा भाडेदारको सामानहरु बाहिर प्यासेजमा राखेर हामी बस्न सुरु गरेका छौँ ।

घर खाली गर्न लाग्दा साहु रामबाबुले प्रहरीलाई बोलाए । प्रहरी पुगेपछि जवर्जस्ती घरमा पस्न नदिने प्रयास गर्दा पनि असफल बन्यो । प्रहरीको अवरोध छल्दै पीडित श्याम घर प्रवेश गरे । श्यामलाई सहयोग गर्न हजारौं मिटर ब्याज पीडितहरू पुगेका थिए ।