जनस्वास्थ्य रक्षाको पक्षमा काठमाडौं महानगरपालिकाको कडा कदम

काठमाडौं महानगरपालिकाले जनस्वास्थ्य रक्षाको पक्षमा कडा कदम चाल्दै ‘प्लाष्टिकमा प्याकेजिङ्ग गरिएका, खैनी, गुट्खा, पानपराग वा यस्तै प्रकृतिका मुखमा राख्ने, रस लिने वा सेवन गर्ने सूर्तीजन्य पदार्थहरुको विक्री वितरण’ निषेध गरेको छ ।

काठामाडौं महानगरपालिकाको स्वास्थ्य विभागको तर्फबाट विभागीय प्रमुख रामप्रसाद पौडेलले ‘अत्यन्त जरुरी सूचना’ जारी गर्दै सो कुराको जानकारी दिएको हो ।

उक्त सूचनाअनुसार, सूचना प्रकाशित भएको मितिले १५ दिनपछि काठमाडौं महानगरपालिका क्षेत्रभित्र त्यस किसिमका पदार्थहरुको विक्री वितरणमा पूर्ण रुपमा प्रतिबन्ध लगाइएको छ । त्यसैगरी, उक्त सूचनाले सार्वजनिक स्थानमा धूमपानलाई समेत पूर्ण रुपमा प्रतिबन्ध लगाएको छ।

काठमाडौं महानगरपालिकाले चालेको यो कदम जनस्वास्थ्यको हिसाबले अत्यन्तै सकारात्मक देखिएको छ । खासगरी, खैनी, गुट्खा, पानपराग वा त्यस्तै प्रकृतिका मुखमा राख्ने रस लिने वा सेवन गर्ने सूर्तीजन्य पदार्थहरुको निर्वाध विक्री वितरणले सरकार महानगरलाई केही राजस्व त प्राप्त भएको होला तर त्यसको तुलनामा त्यसले गर्ने क्षति निक्कै भयानक हुने गरेको थियो । पछिल्लो तथ्यांकअनुसार त्यस प्रकारको वस्तुको सेवनले प्रत्येक वर्ष नेपालमा २० हजारदेखि ३० हजार क्यान्सरका नयाँ रोगीहरु देखापर्ने गरेका थिए । त्यसैगरी, नेपालमा हुने कूल मृत्युका कारणहरुमध्ये १३ प्रतिशतको मृत्यु सूर्तीजन्य पदार्थहरुको सेवनका कारण हुने गरेको थियो ।

यसअघि पनि काठमाडौं महानगरपालिकाले २०७९ असोज १ गतेदेखि नगरभित्रका सार्वजनिक स्थानहरुम धूमपान र सूर्ती सेवनलाई निषेध गरेको थियो । त्यसै गरी, त्यसअघि पनि तत्सम्बन्धी प्रयासहरु भएका थिए । तर ती कुनै पनि प्रयासहरु प्रभावकारी साबित हुने सकेको थिएन ।