इजरायल घटनाका मृतकको सम्मानमा राष्ट्रिय शोक

इजरायलमाथि प्यालेष्टाइनी समूह हमासले गरेको भीषण आक्रमणमा परी १० जना नेपालीहरु समेतको ज्यान गएको छ । विदेशी भूमिमा अप्रत्याशित ढंगले मृत्युवरण गर्न बाध्य तुल्याइएका तिनै नेपालीको सम्मानमा सरकारले असोज २३ गते मंगलबार राष्ट्रिय शोकको घोषणा गरेको छ ।

राष्ट्रिय शोक मनाउनका लागि मंगलबार देशभरिका सरकारी कार्यालय तथा विदेशस्थित नेपाली नियोगहरुमा राष्ट्रिय झण्डा आधा झुकाइनेछ ।

असोज २२ गते सोमबार बसेको मन्त्रिपरिषद्को आकस्मिक बैठकले सो निर्णय गरेको हो । सोही बैठकले मृतकहरुप्रति श्रद्धान्जली अर्पण गर्दै घाइतेहरुको शीघ्र स्वास्थ्यलाभको समेत कामना गरेको छ । त्यसबाहेक, मृतक परिवारलाई राहतस्वरुप जनही १० लाख पनि उपलब्ध गराइने भएको छ । सोही बैठकले इजरायल सरकारसँगको समन्वय र सहयोगमा इजरायलस्थित नेपाली दूतावासले बेपत्ता नेपालीको खोजीमा तीव्रता दिने र घाइतेहरुको उपचारका लागि समन्वय गर्ने निर्णय गरेको छ । 

सरकारले इजरायल सरकारसँग समन्वय गरी मृतकहरुको शव ल्याउन पहल थालेको छ ।

स्मरण रहोस्, वैदेशिक रोजगारीका लागि इजरायल पनि नेपालीहरुको लागि एउटा प्रमुख गन्तव्य हो । हज्जारौं नेपालीहरु अहिले पनि इजरायलमा श्रम कार्यमा खटिइरहेका छन् । अहिलेको विषम परिस्थितिमा नेपाल फर्कन चाहनेलाई दूतावासले समन्वय गरी लगत संकलन गर्ने र तिनीहरुलाई नेपाल फर्काउने भएको छ ।