चिनियाँ प्रम भन्छन्ः शीतयुद्ध– ‘नो’ !

चिनियाँ प्रधानमन्त्री ली चियाङले शीतयुद्धलाई विरोध गर्नुपर्ने र पारस्परिक सहयोग बृद्धितिर लाग्नुपर्ने बताएका छन् ।

इण्डोनेशियाको राजधानी जाकर्तामा आयोजित चीन–आशियानको २६ औं शिखर सम्मेलनलाई भदौ २० गते बुधबार सम्बोधन गर्दै उनले उक्त कुरा बताएका हुन् ।

चीन र आशियान मुलुकहरुले सही बाटो हिँड्दासम्म जस्तोसुकै आँधीतुफान आएपनि उनीहरु बीचको एकता सदाझै मजबूत रहने र सबैखाले कठिनाईहरुविरुद्ध लड्दै अघि बढ्ने कुरा पनि उनले बताए । उनका अनुसार चीन–आशियानबीचको निकटतम गठबन्धन कायम रहने र तनाव एवं द्वन्द्वलाई बढाउन खोज्ने बाह्यहस्तक्षेपहरुविरुद्ध अडिग भएर विकासको पथमा अगाडि बढिरहनेछ ।

चीन र आशियान मुलुकहरुले आपसी असहमति–असमझदारीहरुलाई वार्ता र संवादको माध्यमबाट सही ढंगले व्यवस्थापन गर्दै आएको पनि प्रधानमन्त्री ली चियाङको भनाइ थियो ।

चिनियाँहरुको बुझाइमा अमेरिकाले दक्षिण–चिनियाँ समुद्रका बारेमा त्यस क्षेत्रका मुलुकहरुबीचको आपसी विवादहरुमा खेल्दै नयाँ विवादहरु सिर्जना गरी त्यस क्षेत्रमा अस्थीरता सिर्जना गर्न र विकासलाई कामहरुलाई अवरुद्ध गर्न खोजिरहेको छ । त्यसका विपरीत चीनले चाहिँ त्यस समग्र क्षेत्रमा विकास र सुरक्षा सहयोगलाई बढाउने दिशामा अग्रसर रहँदै आएको चीनको दावी छ ।

 Photo: Golble Times