अन्तरिम सरकारले बंगलादेशलाई गृहयुद्धतर्फ धकेलिरहेको छ : वर्कर्स पार्टी

बंगलादेशको ढाकास्थित दैनिक प्रथम आलो को कार्यालयमा भएको भीडद्वारा आक्रमण र आगजनीपछि देखिएको अवस्था। तस्बिर: विकिमिडिया कमन्स

अब्दुल रहमान

बंगलादेशका सम्पादक परिषद् र समाचारपत्र मालिक संघ (NOAM) को संयुक्त आयोजनामा सोमबार, डिसेम्बर २२ का दिन ढाकामा आयोजित विरोध प्रदर्शनमा दर्जनौँ पत्रकार, राजनीतिक तथा मानवअधिकार अभियन्ताहरू सहभागी भए। उनीहरूले गत साता देशका अग्रणी पत्रपत्रिका र पत्रकारहरूमाथि भएका आक्रमणहरूको कडा निन्दा गरे।

यस्ता आक्रमणहरू आलोचनात्मक आवाजहरू दबाउन गरिएको प्रयास भएको दाबी गर्दै वक्ताहरूले देशका सामाजिक शक्तिहरूलाई बाँकी रहेका सामाजिक तथा राजनीतिक स्वतन्त्रताको संरक्षणका लागि विरोधमा आवाज उठाउन आह्वान गरे।

गत वर्ष अन्तरिम प्रशासन गठन भएयता बंगलादेशमा अवामी लिग र बंगलादेश वर्कर्स पार्टी (WPB) जस्ता विपक्षी दलहरू, धार्मिक अल्पसंख्यक समुदायहरू तथा बंगलादेशको राष्ट्रिय मुक्ति सङ्घर्षका प्रतीकहरूमाथि पटक–पटक आक्रमणहरू हुँदै आएका छन्।

यद्यपि, गत साता देशमा हिंसाको नयाँ शृङ्खला त्यसपछि सुरु भयो, जब गत वर्ष जुलाई–अगस्टमा शेख हसिनाको सरकारविरुद्ध भएको कोटा-विरोधी आन्दोलनका प्रमुख आयोजक तथा ढाकाका एक निर्वाचन क्षेत्रबाट आगामी राष्ट्रिय निर्वाचनका उम्मेदवार शरीफ उस्मान हादीको मृत्यु भएको खबर सार्वजनिक भयो।

हादीलाई डिसेम्बर १२ मा ढाकामा गोली हानिएको थियो र उपचारका लागि सिङ्गापुरको एक अस्पतालमा भर्ना गरिएको थियो, जहाँ डिसेम्बर १८ मा उनको निधन भयो।

उनको मृत्यु भएको रात, जमात–ए–इस्लामीको पुरुष विद्यार्थी सङ्गठन बंगलादेश इस्लामी छात्र शिबिरका सदस्य तथा विद्यार्थी नेता मोस्ताकुर रहमानले भाषण दिँदै देशका दुई अग्रणी दैनिक पत्रपत्रिका—डेली स्टार र प्रथम आलो (Prothom Alo) बन्द गर्न आह्वान गरे।

प्रथम आलोका अनुसार, रहमानले राजशाहीमा जम्मा भएको ठूलो भीडलाई सम्बोधन गर्दै भने, “आजको कार्यक्रमबाट हामी घोषणा गर्छौँ कि प्रथम आलो र डेली स्टारलगायत यी तथाकथित ‘सभ्य’ पत्रपत्रिकाहरू बन्द गरिनुपर्छ। यदि प्रथम आलो वा डेली स्टारका कुनै पत्रकारहरू यस कार्यक्रममा उपस्थित छन् भने, उनीहरूले तुरुन्तै यहाँबाट निस्कनुपर्छ।”

उनका आह्वानहरू सामाजिक सञ्जालभर अरूले पनि दोहोर्याए, र छिट्टै मानिसहरूको भीडले त्यसको आधारमा कारबाही गर्न थाल्यो।

त्यही रात र भोलिपल्ट बिहानसम्म, डेली स्टार र प्रथम आलो का कार्यालयहरूमा, भित्र सयौँ पत्रकार तथा अन्य कर्मचारीहरू उपस्थित हुँदाहुँदै पनि, ठूलो र हिंस्रक भीडले आक्रमण गरी तोडफोड गर्‍यो। सोही दिन अर्को पत्रिका न्यू एज का सम्पादकलाई पनि भीडले दुर्व्यवहार गर्‍यो।

आक्रमणबाट भएको क्षतिका कारण डेली स्टार र प्रथम आलो दुवैले डिसेम्बर १९ मा आफ्ना संस्करणहरू प्रकाशन गर्न सकेनन्। प्रथम आलो ले आफ्नो स्थापना भएको २७ वर्षमा पहिलो पटक संस्करण प्रकाशन गर्न नसकेको दाबी गरेको छ।

स्थानीय सञ्चारमाध्यमहरूका अनुसार, आक्रमणकारीहरूले डेली स्टार र प्रथम आलो माथि शेख हसिनाको अवामी लिगको विचारधारालाई प्रवर्द्धन गरेको आरोप लगाएका थिए। उक्त दललाई आगामी वर्ष हुने राष्ट्रिय निर्वाचनमा प्रतिस्पर्धा गर्न प्रतिबन्ध लगाइएको छ।

पत्रपत्रिकामाथिका यी आक्रमणहरू, वामपन्थी बंगलादेश वर्कर्स पार्टी (WPB) तथा यसको विद्यार्थी र युवा सङ्गठनहरूको कार्यालय, देशका अग्रणी सांस्कृतिक संस्थाहरू छायानट र उदिची, अल्पसंख्यक धार्मिक समुदायका सदस्यहरू, साथै बंगलादेशको मुक्ति युद्धका नेता तथा पहिलो प्रधानमन्त्री शेख मुजिबुर रहमानको स्मारकमाथि भएका हिंस्रक आक्रमणहरूको शृङ्खलाको हिस्सा थिए।

बंगबन्धु भवन नामले चिनिने उक्त स्मारक ढाकाको धनमण्डी क्षेत्रमा अवस्थित छ। यस वर्ष फेब्रुअरीमा पनि उक्त स्मारकमाथि आक्रमण गरी तोडफोड गरिएको थियो।

फेब्रुअरीमा धनमण्डीमा भएको आक्रमण, मोहम्मद युनुसको नेतृत्वमा रहेको अन्तरिम सरकारमा सहभागी कोटा–विरोधी आन्दोलनका नेताहरूको अगुवाइमा गरिएको थियो। ती राजनीतिक धाराहरूले अहिले नेशनल सिटिजेन्स पार्टी (NCP) गठन गरिसकेका छन् र आगामी राष्ट्रिय निर्वाचनमा प्रतिस्पर्धा गरिरहेका छन्।

गृहयुद्धतर्फ धकेल्ने प्रयास

अवामी लिगले धनमण्डीमाथिका आक्रमणहरूलाई देशको इतिहास मेटाउने प्रयासको रूपमा व्याख्या गर्दै, यस्ता प्रयासहरूलाई जनताले प्रतिरोध गर्ने आशा व्यक्त गरेको छ।

पीपुल्स डिस्प्याच सँगको संवादमा वामपन्थी अभियन्ता शरीफ शम्सिरले गत साता भएका आक्रमणहरू देशभित्र धर्मनिरपेक्ष र राष्ट्रवादी विपक्षी शक्तिहरूलाई दबाउने योजनाबद्ध प्रयासको हिस्सा भएको दाबी गरे। उनका अनुसार, मोहम्मद युनुसप्रति अनुकूल धारणा राख्दा–राख्दै पनि ती पत्रपत्रिकाहरू देशमा बढ्दो धार्मिक अतिवादविरुद्ध लेखिरहेकाले र धर्मनिरपेक्ष राजनीतिक व्यवस्थाको पक्षमा उभिएकाले उनीहरूलाई लक्षित गरिएको हो।

शम्सिरले आक्रमणकारीहरूलाई जमात–ए–इस्लामी (JI) लगायतका राजनीतिक संरचनाहरूको समर्थन रहेको दाबी पनि गरे। उनका अनुसार, ती शक्तिहरूले यस वर्ष डिसेम्बर १६ मा परेको राष्ट्रिय मुक्ति दिवसको अवसरमा देशको राष्ट्रिय मुक्ति आन्दोलनको प्रशंसा गर्दै यी पत्रपत्रिकाहरूले लेखहरूको शृङ्खला प्रकाशित गरेकोप्रति असन्तुष्टि व्यक्त गरेका थिए।

धर्मनिरपेक्ष राष्ट्रवादी गठबन्धनको हिस्सा भई राजनीतिक क्षेत्रमा धार्मिक समूहहरूको विरोध गर्ने शक्ति मानिने भएकाले, बंगलादेश वर्कर्स पार्टी (WPB) तथा यसको युवा र विद्यार्थी मोर्चाका कार्यालयहरूमा दक्षिणपन्थी भीडद्वारा पटक–पटक आक्रमण हुँदै आएका छन्। बंगलादेश वर्कर्स पार्टीले अन्तरिम सरकारलाई देशभित्र साम्राज्यवादी हस्तक्षेपको साधन भएको आरोपसमेत लगाएको छ।

सोमबार जारी गरिएको एक विज्ञप्तिमा जुबो मैत्री (WPB को युवा सङ्गठन) ले भन्यो, “आक्रमण, तोडफोड, आगजनी र जबर्जस्ती कब्जाका यस्ता बारम्बार घट्ने घटनाहरूले लोकतान्त्रिक बंगलादेश निर्माणका लागि भइरहेको सङ्घर्षमा गम्भीर अवरोध खडा गरिरहेका छन् र स्वतन्त्र सोच तथा अभिव्यक्तिको अभ्यासलाई गम्भीर रूपमा अवरुद्ध गरिरहेका छन्।”

गत साता भएको हिंसाको निन्दा गर्दै बंगलादेश वर्कर्स पार्टीले देशमा राजनीतिक तथा सञ्चारमाध्यमको स्वतन्त्रता संरक्षण गर्न अन्तरिम सरकार असफल भएको र चरमपन्थी शक्तिहरूअगाडि आत्मसमर्पण गरेको पुनः दोहोर्‍यायो।

युनुसले व्यक्तिगत रूपमा ती आक्रमणहरूलाई बर्बर भन्दै निन्दा गरे तापनि, आक्रमणकारीहरूविरुद्ध कडा कदम चाल्न नसकेको भन्दै उनको सरकार तीव्र आलोचनाको घेरामा परेको छ।

बंगलादेश वर्कर्स पार्टीको विज्ञप्तिमा भनिएको छ, “साम्राज्यवादी र कट्टरपन्थी शक्तिहरूले अत्यन्तै योजनाबद्ध ढङ्गले बंगलादेशलाई अस्थिर बनाएका छन् र सत्तारूढ शासनको सहकार्यमा भीडशासन (मब रुल) को शासन स्थापित गरेका छन्।”

बंगलादेश वर्कर्स पार्टीले युनुस शासनकालमा हत्या, आतङ्कवाद, बलात्कार तथा मानवअधिकार उल्लङ्घनका घटनाहरू सामान्यजस्तै बन्न पुगेको आरोप लगाएको छ।

सरकारले चरमपन्थी शक्तिहरूलाई कुनै पनि दण्डबिना कानुन आफ्नै हातमा लिन दिएको र त्यसमार्फत देशको धार्मिक तथा राजनीतिक बहुलता संरक्षण गर्न असफल भएको अवस्थामा, बंगलादेश गृहयुद्धतर्फ धकेलिने बंगलादेश वर्कर्स पार्टीले चेतावनी दिएको छ।

Source: https://peoplesdispatch.org