विषादीले मानिसको आन्द्रामा रहेका फाइदा गर्ने सूक्ष्मजीवहरूलाई खतरा पुर्‍याउँछन्

एर्नी मुन्डेल

व्यावसायिक खेतीबालीमा प्रयोग हुने, र तपाईंको घरको पछाडिको फुलबारीमा छर्किने विषादीहरूले समेत तपाईंको आन्द्रामा बस्ने स्वास्थ्यका लागि उपयोगी ब्याक्टेरियालाई हानि पुर्‍याइरहेको हुनसक्ने नयाँ अनुसन्धानले संकेत गरेको छ ।

समस्या कीटनाशकमा मात्र सीमित छैन। बेलायती शोधकर्ताहरूले आधुनिक घरायसी वातावरणमा सर्वव्यापी तरिकाले देखिने फ्लेम रिटार्डेन्टहरू र प्लास्टिकमा प्रयोग हुने यौगिकहरू जस्ता अन्य रसायनहरू पनि तपाईंको “माइक्रोबायोम” अर्थात् पाचन तन्त्रमा बस्ने खरबौँ उपयोगी जीवाणुहरूको लागि हानीकारक हुनसक्ने बताएका छन्।

“हामीले पत्ता लगायौँ कि कीरा वा ढुसीमाथि मात्रै प्रभाव पार्ने उद्देश्यले बनाइएका धेरै रसायनहरूले आन्द्राका ब्याक्टेरियालाई पनि असर गर्छन्,” अध्ययनका प्रमुख लेखक क्याम्ब्रिज विश्वविद्यालयको MRC टक्सिकोलोजी युनिटका इन्द्रा रूले भने। “यीमध्ये केही रसायनहरूले यति शक्तिशाली प्रभाव देखाउने कुरा हामीलाई आश्चर्य लाग्यो। उदाहरणका लागि, हामी नियमित सम्पर्कमा रहने तथा जीवित जीवमा कुनै प्रभाव पार्दैनन् भन्ने विश्वास गरिएको फ्लेम रिटार्डेन्ट र प्लास्टिसाइजरजस्ता धेरै औद्योगिक रसायनहरुले समेत  असर गर्छन्।”

उक्त जानकारी नेचर माइक्रोबायोलोजी पत्रिकामा प्रकाशित छ।

आफ्नो अनुसन्धानमा, रू र सहकर्मीहरूले मानव आन्द्रामा सामान्यतया पाइने २२ प्रजातिका उपयोगी ब्याक्टेरियामाथि १,०७६ रसायनहरूको प्रयोगशाला परीक्षण गरे।उनीहरूले विश्वविद्यालयको समाचार विज्ञप्तिमा उल्लेख गरेअनुसार यो संख्या मानव शरीरभित्र वा बाहिर बस्ने लगभग ४,५०० उपयोगी जीवाणु प्रजातिहरूमध्ये एक सानो अंश मात्र हो।

माइक्रोबायोममा हुने अवरोधहरूले मोटोपना, पाचनसम्बन्धी समस्या, रोग प्रतिरोधात्मक स्थितिहरू र यहाँसम्म कि मानसिक स्वास्थ्यसम्बन्धी समस्यासहित अनेक स्वास्थ्य समस्या सुरु गरिदिन सक्छन्।

अनुसन्धानका क्रममा क्याम्ब्रिज समूहले आन्द्राका ब्याक्टेरियालाई हानी गर्ने तथा  तिनको स्वस्थ वृद्धि रोकिदिने  कुल मिलाएर  १६८ रसायन पहिचान गर्‍यो ।

अनुसन्धानले ती रसायनहरूको प्रतिरोध गर्न ब्याक्टेरियाले गरेका प्रयासले केही प्रजाति सामान्य एन्टिबायोटिक सिप्रोफ्लोक्सासिनप्रति प्रतिरोधी बनेको पनि देखायो । यसले एन्टिबायोटिकमार्फत संक्रमणको उपचार अझ कठिन बनाउन सक्ने अध्ययनकर्ताहरूले जनाएका छन् ।

अध्ययनकर्ताहरूका अनुसार, कीटनाशकको जोखिम घटाउने एक मात्र उपाय भनेको फलफूल र तरकारी खानुअघि धुने र घरको बगैँचामा सकेसम्म कीटनाशक प्रयोग नगर्नु नै हो।

धेरै रसायन, जस्तै कीटनाशक, कीरालाई लक्षित गरेर डिजाइन गरिएका हुन्छन्, तर तिनको माइक्रोबायोमका ब्याक्टेरियामाथिको प्रभाव अहिलेसम्म अध्ययन गरिएको थिएन। यस अध्ययनबाट प्राप्त नयाँ तथ्याङ्क सुरक्षित रसायन बनाउने प्रक्रियामा उपयोगी हुनसक्छ, अध्ययनका वरिष्ठ लेखक तथा MRC टक्सिकोलोजी युनिटकै किरण पाटिलले भने।

“यस व्यापक अध्ययनको वास्तविक शक्ति यो हो कि अहिले हामीसँग नयाँ रसायनको प्रभाव पूर्वानुमान गर्न सक्ने तथ्याङ्क छ, जसले भविष्यमा डिजाइनकै तहमा सुरक्षित रसायन विकास गर्न सहयोग गर्न सक्छ,” उनले समाचार विज्ञप्तिमा भनेका छन् ।

शोधकर्ताहरूले उल्लेख गरेअनुसार यी अध्ययनहरू प्रयोगशालामा गरिएका हुनाले, आन्द्रामा बस्ने ब्याक्टेरियाले वास्तविक रूपमा कीटनाशक वा अन्य रसायनसँग कति मात्रामा सम्पर्क गर्छन् भन्ने कुरा अझै अज्ञात छ।

“अब हामीले प्रयोगशाला वातावरणमा यी अन्तर्क्रियाहरू पत्ता लगाउन थालेका छौँ, त्यसैले अब वास्तविक संसारमा रसायनसँग हुने सम्पर्कसम्बन्धी थप तथ्य सङ्कलन गर्नु महत्वपूर्ण हुन्छ, ताकि हाम्रो शरीरमा पनि यस्तै प्रभाव देखिन्छ कि छैन भन्ने थाहा पाउन सकियोस्,” पाटिलले भने।

स्रोत: https://www.medicinenet.com. Image: https://api.kataeb.org