चङ्गा खेती
भदौ २८, २०८२ शनिबार ०३:४०
प्रभुहरु !
पुराना चङ्गा गोदाममा
नयाँ चङ्गा आकाशमा
प्रभुहरु !
हजुरहरुको लीला अपार
गुड देखाएर पिना चटाउने जादु अपार
उहिलेका प्रभुहरु
भगवानको नाममा भोग खान्थे
अहिलेका प्रभुहरु
‘कलर रेभुलेसन’को नाममा भोग खान्छन् ।
सातसालले भिमदत्त खायो
छ्यालीसले मदन भण्डारी खायो
बाउन्नले राजा वीरेन्द्र खायो
प्रभुहरु मान्छे छानीछानी भोग खान्छन् ।
प्रभुहरुको लीला अपार
गुड देखाएर पिना चटाउने जादु अपार ।
बैसठ्ठी त्रिसठ्ठीले
देश बालेर देशको खरानी खायो
जेनजीको सपनाहरु के हुने हो प्रभु ???
हजुरहरुको लीला अपार
गुड देखाएर पिना चटाउने जादु अपार।
प्रभु !
लालाबालाको भोग खाएपछि
देश बालेर खरानी बनाएपछि
पुराना चङ्गा गोदाममा थन्काएपछि
नयाँ चङ्गा आकाशमा उडाएपछि
प्रभु अब हजुरहरुको आगामी योजना के छ ?
प्रभुहरु !
यो देशमा
चङ्गा हजुरकै
चङ्गा बनाउने कारखाना हजुरकै
चङ्गा उडाउने हात हजुरकै
चङ्गा थन्काउने गोदाम हजुरकै।
तर प्रभु नित्य के छ जगतमा
फेरि चङ्गा उडने आकाशमा चरा उडने छ ।
उडने चराको
प्वाँख आफ्नै
पखेटा आफनै
उडान आफ्नै
गन्तव्य आफ्नै।
प्वाखविहीन चङ्गाको
के नै आफ्नो हुन्छ
उडने धागो त आफ्नो हुँदैन
चङ्गा उडाउ प्रभुहरु चङ्गा
चङ्गा खेतीको एकदिन अन्त्य हुनेछ।
प्रतिक्रिया