इला शर्माको निधन

निर्वाचन आयोगकी पूर्वआयुक्त इला शर्माको शनिबार साँझ हृदयघातका कारण निधन भएको छ।

छातीमा असहजता महसुस भएपछि उनलाई थापाथलीस्थित नर्भिक अस्पताल लगिएको थियो । साँझ ७ बजे चिकित्सकले उनको मृत्यु भएको घोषणा गरेका हुन्।

शर्माले संविधानसभा निर्वाचनलगायत महत्वपूर्ण राजनीतिक संक्रमणकालीन चरणमा निर्वाचन आयोगको नेतृत्वमा सक्रिय भूमिका निर्वाह गरेकी  थिइन् । उनले २०६९ सालदेखि २०७५ सालसम्म आयुक्तका रूपमा सेवा दिएकी थिइन्। पूर्व पत्रकारसमेत रहेकी शर्मा प्राध्यापन क्षेत्रमा समेत संलग्न रहेकी थिइन्।

धनुषा जिल्लामा जन्मिएकी शर्माको बाल्यकाल बनारसमा बितेको थियो। सामाजिक विषयमा स्पष्ट दृष्टिकोण राख्ने व्यक्तित्वको रूपमा चिनिएकी शर्माले निर्वाचन आयुक्तको कार्यकालमा कसरी राजनीतिक हस्तक्षेपहरु हुन्थे भन्ने कुरालाई सार्वजनिक रुपमा भण्डाफोर गर्दै आएकी थिइन् । उनी निर्वाचनमा सुधारका लागि राजनीतिक वित्तमा पारदर्शिता तथा निर्वाचन खर्चमा नियन्त्रण गर्नु पर्ने आवश्यकता औंल्याउने गर्थिन् ।