अमेरिका एआईको क्षेत्रमा वर्चस्व कायम राख्न प्रयासरत छ
मंसिर ७, २०८१ शुक्रबार ०५:१३
२४ अक्टोबर २०२४ मा जो बाइडेनले लामो शीर्षकसहितको एक ज्ञापनपत्रमा हस्ताक्षर गरे ; “…कृत्रिम बुद्धिमत्तामा संयुक्त राज्य अमेरिकाको नेतृत्वलाई अघि बढाउने; राष्ट्रिय सुरक्षा लक्ष्यहरू पूरा गर्न कृत्रिम बुद्धिमत्ताको उपयोग गर्ने; र कृत्रिम बुद्धिमत्ताको सुरक्षा र विश्वासनीयता लाई सुनिश्चित गर्ने।"
यो दस्तावेजले ३० अक्टोबर २०२३ मा कृत्रिम बौद्धिकताको प्रयोगमा जारी गरिएको राष्ट्रपतिको आदेशको प्रभावलाई विश्वव्यापी स्तरमा विस्तार गर्छ। वास्तवमा यसमा भनिएको छ कि यस क्षेत्रमा एकाधिकार कायम गर्न आवश्यक छ। जहाँ वाशिंगटनले के गर्न मिल्छ र के गर्न मिल्दैन भनेर निर्धारण गर्नेछ। ह्वाइट हाउसको परिकल्पना अनुसार, पश्चिमी "नियममा आधारित व्यवस्था" इन्टरनेटमा पनि लागू गरिनुपर्छ। त्यसमा नयाँ कार्यक्रमहरू र एप्लिकेसनहरू समावेश गरिनुपर्छ।
यस दस्तावेजमा खुला रूपमा भनिएको छ, "सबैभन्दा पहिले, संयुक्त राज्य अमेरिकाले विश्वको सुरक्षित, संरक्षित र विश्वासिलो कृत्रिम बुद्धिमत्ता (AI) विकासको नेतृत्व गर्नुपर्छ। यसका लागि, संयुक्त राज्य अमेरिका सरकारले उद्योग, नागरिक समाज, र शैक्षिक क्षेत्रको बीच साझेदारीमा कृत्रिम बुद्धिमत्ता विकासमलाई शक्ति प्रदान गर्ने आधारभूत क्षमता र ढाँचालाई प्रोत्साहित र सुरक्षित गर्नुपर्छ। संयुक्त राज्य अमेरिका सरकारले अमेरिकाको कृत्रिम बुद्धिमत्ता पारिस्थितिकी तन्त्रको बेजोड जीवन्तता र नवप्रवर्तनलाई हल्का रूपमा लिन सक्दैन। यसलाई सक्रिय रूपमा सुदृढ पार्न आवश्यक छ। ताकि संयुक्त राज्य अमेरिका विश्वव्यापी प्रतिभाका लागि सबैभन्दा आकर्षक गन्तव्य रहिरहोस् र विश्वकै सबैभन्दा परिष्कृत कम्प्युटेशनल सुविधाहरूको घर बनिरहोस्। संयुक्त राज्य अमेरिका सरकारले कृत्रिम बुद्धिमत्ता विकासकर्ता र प्रयोगकर्ताहरूलाई उपयुक्त संरक्षण र सुरक्षाको मार्गनिर्देशन दिनुपर्छ। कृत्रिम बुद्धिमत्ता प्रणालीले उत्पन्न गर्न सक्ने जोखिमहरूको शशक्त मूल्यांकन गरी ती जोखिमहरूलाई कम गर्न मद्दत आवश्यक छ।"
"दोस्रो, अमेरिकाको सरकारले राष्ट्रिय सुरक्षा लक्ष्यहरू हासिल गर्न शक्तिशाली कृत्रिम बुद्धिमत्ताको प्रयोग गर्नुपर्छ। तर यसका लागि उचित सुरक्षा उपायहरू अपनाउन आवश्यक छ। विकसित भइरहेका एआई क्षमताहरू, जसमा सामान्य उद्देश्यका मोडेलहरू पनि समावेश छन्। यिनिहरुले राष्ट्रिय सुरक्षामा सुधार गर्ने ठूला सम्भावनाहरु दिन्छन्। तर, यी प्रणालीहरूको प्रभावकारी रूपमा उपयोग गर्नका लागि ठूला प्राविधिक, संगठनात्मक, र नीतिगत परिवर्तनहरू आवश्यक हुन्छ। अमेरिकाले एआई को फाइदाहरू उपयोग गर्दा यसका सीमाहरू पनि बुझ्नुपर्छ। कुनै पनि एआई को प्रयोगले पारदर्शिता, मानव अधिकार, नागरिक अधिकार, नागरिक स्वतन्त्रता, गोपनीयता, र सुरक्षाका सन्दर्भमा लोकतान्त्रिक मूल्यहरूको सम्मान गर्नुपर्छ।"
"तेस्रो, संयुक्त राज्य अमेरिकाको सरकारले अन्तर्राष्ट्रिय एआई शासनलाई अगाडि बढाउनका लागि एक स्थिर र जिम्मेवार ढाँचा निर्माण गर्न निरन्तर प्रयास गर्नुपर्छ।जसले सुरक्षित, भरपर्दो र विश्वासिलो AI प्रणाली विकास तथा प्रयोगलाई प्रवर्द्धन गर्दछ। AI का जोखिमहरूलाई व्यवस्थापन गर्दछ। लोकतान्त्रिक मूल्यहरूको महसुस गराउँछ। मानव अधिकार, नागरिक अधिकार, नागरिक स्वतन्त्रता र गोपनीयतालाई सम्मान गर्दछ। र AI बाट विश्वव्यापी फाइदाहरू प्रवर्द्धन गर्दछ। यसका लागि विभिन्न साझेदार र सहयोगी राष्ट्रहरूको साथमा सहकार्य गर्नुपर्छ। AI को युगमा अमेरिकाको सफलता केवल प्रविधि र नवप्रवर्तनको वर्चस्वले मात्र मापन गर्न सक्दैन। तर अन्तर्राष्ट्रिय कानुन, मानव अधिकार, नागरिक अधिकार र लोकतान्त्रिक मूल्यहरूमा आधारित संस्थाहरूमा संलग्न रहि प्रभावकारी विश्वव्यापी मान्यता निर्माण र विकास गर्ने नेतृत्वबाट पनि मापन गरिनेछ।"
सिलिकन भ्यालीका आईटी विज्ञ र पूँजीपतिहरू – गुगल, माइक्रोसफ्ट, अमेजन, मेटा आदिको उदाहरणमा हेर्दा, अमेरिकी कम्पनीहरूले नागरिक स्वतन्त्रता र लोकतान्त्रिक मूल्यहरूलाई कसरी सम्बोधन गर्छन् भन्ने कुरा सारा संसारलाई थाहा छ। यस्ता क्रियाकलापहरूमा सेन्सरशिप, एल्गोरिदम हेरफेर, सामाजिक इन्जिनियरिङ र व्यक्तिगत तथ्याङ्कको बिना स्वीकृत प्रयोगलाई समावेश गरिन्छ। यो सबै कृत्रिम बुद्धिमत्ताको प्रयोगले अझै सजिलो हुनेछ। किनकि ‘प्राविधिक त्रुटि’ भएको भनेर सधैं बहाना गर्न सकिन्छ।
ध्यान दिनुपर्ने अर्को महत्त्वपूर्ण पक्ष तथाकथित “ब्रेन ड्रेन”को समस्या हो। किनकि ज्ञापनपत्रमा स्पष्ट रूपमा भनिएको छ, “अमेरिकाको सरकारले कानूनी रूपमा एआई र सम्बन्धित क्षेत्रमा अत्यन्त दक्ष गैर-नागरिकहरूलाई अमेरिका प्रवेश गराउने र काम गर्न दिने क्षमताको प्रवर्द्धनलाई राष्ट्रिय सुरक्षा प्राथमिकता मानेको छ। आज, अमेरिकाको असाधारण एआई उद्योगमा ठूलो अंश ती उत्कृष्ट वैज्ञानिक, इन्जिनियर र उद्यमीहरूको योगदानमा आधारित छ। जो शैक्षिक, सामाजिक र आर्थिक अवसरको खोजीमा अमेरिका प्रवेश गरेका थिए।”
यो स्पष्ट संकेत हो कि वाशिंगटनले विभिन्न बहानामा विदेशी वैज्ञानिकहरू र विज्ञहरूलाई आफ्ना कम्पनीहरूमा आकर्षित गर्न प्रयास गर्नेछ। र जब उनीहरू राष्ट्रिय सुरक्षाको कुरा गरिरहेका छन्, यो प्रस्ट रूपमा अमेरिकाको हितमा छ कि ती व्यक्तिहरू जो अन्य देशमा गोप्य अनुसन्धान र विकासमा संलग्न छन् उनीहरुलाई समावेश गरियोस् ।
यस दस्तावेज़ले रक्षा विभाग (DOD) र आन्तरिक सुरक्षा विभाग (DHS) लाई सबै उपलब्ध कानूनी अधिकारहरूको प्रयोग गरेर सम्बन्धित प्राविधिक विशेषज्ञता भएका व्यक्तिहरूलाई संयुक्त राज्य अमेरिकामा छिटो ल्याउन र आकर्षित गर्न सहयोग गर्न निर्देशन दिएको संकेत गर्दछ। दस्तावेज़ले स्मरणपत्रको मिति अनुसार १८० दिनको समय प्रदान गरेको छ। जसमा संयुक्त राज्य अमेरिका र विदेशमा एआई प्रतिभा बजारको विश्लेषण तयार गर्न भनिएको छ। सोही समयसीमा भित्र संयुक्त राज्य अमेरिकाको निजी क्षेत्रको एआई पारिस्थितिकी तंत्रको तुलनात्मक प्रतिस्पर्धात्मक लाभको आर्थिक मूल्याङ्कन गर्ने, निजी क्षेत्रको मुख्य स्रोतको प्रतिस्पर्धात्मक लाभको पहिचान गर्ने, र त्यस स्थितिमा सम्भावित जोखिमहरूको मूल्याङ्कन गरी ती जोखिमहरू न्यूनीकरण गर्ने कुरा नीतिमा सिफारिस गर्ने भनिएको छ। राष्ट्रिय सुरक्षा निकायहरूलाई यसको आधा समय - ९० दिन दिइएको छ। जसमा राष्ट्रिय सुरक्षा मामिलाका लागि राष्ट्रपतिको सहायक (APNSA) ले सम्बन्धित कार्यकारी विभाग र एजेन्सीहरूलाई संवेदनशील प्राविधिक क्षेत्रमा कार्यरत भिसा आवेदनहरूको प्रशासनिक प्रक्रिया प्राथमिकता दिन सहज बनाउने कार्यहरूको अन्वेषण गर्न बैठक आह्वान गर्नेछन्। यसले एआई र अन्य महत्वपूर्ण र उदाउँदो प्रविधिहरूमा अत्यधिक कुशल आवेदनहरूको प्रक्रिया सहज बनाउन सहयोग गर्नेछ।
यसको परिणामस्वरूप, निकट भविष्यमा अमेरिकी एजेन्टहरूले दूतावासहरू र अन्य संस्थाहरू मार्फत कृत्रिम बुद्धिमत्ता (AI) विकासको क्षेत्रमा अनुभव भएका देशहरूलाई स्क्यान गर्न थाल्नेछन्। साथै विदेशीहरूलाई भर्ना गर्न थाल्नेछन्।
हुन त हाल अमेरिकी कानूनी प्रवर्तन निकायहरू र गुप्तचर एजेन्सीहरू अब आफ्नो गतिविधिहरूमा एआईलाई अझ सक्रिय रूपमा लागू गर्न बाध्य भएका छन्। ज्ञापनपत्रमा भनिएको छ कि रक्षा विभाग “DOD, वाणिज्य विभाग, DOE, DHS, ODNI, NSF, NSA, र नेशनल स्प्याटियल-इन्टेलिजेन्स एजेन्सी (NGA) ले लागू हुने कानूनको अधीनमा, AI को सुरक्षा र विश्वसनीयता बारेको अनुसन्धानलाई प्राथमिकता दिनुपर्छ।” उपयुक्त र विद्यमान प्राधिकरणसँग सामान्जस्य राखेर, तिनीहरूले प्रमुख सार्वजनिक क्षेत्र, उद्योग, नागरिक समाज, शैक्षिक र अन्य संस्थाहरूसँग सहकार्य गर्ने प्रयास गर्नेछन् जसले यी क्षेत्रहरूमा विशेषज्ञता राख्छन्। ताकि एआई सुरक्षा र विश्वासको क्षेत्रमा प्राविधिक र सामाजिक-प्राविधिक क्षेत्रमा द्रुत प्रगति गर्न सकियोस्। यो कार्यमा व्याख्यात्मकता, औपचारिक विधिहरू, गोपनीयता सुधार प्रविधिहरू, नागरिक स्वतन्त्रता र मानव अधिकारलाई जोखिम पुर्याउने उपायहरू, मानव-अर्टिफिसियल इन्टेलिजेन्स (एआई) अन्तरक्रिया, अथवा कृत्रिम र वास्तविक सामग्रीको पहिचान र लेबलिङका सामाजिक-प्राविधिक प्रभावहरूमा (उदाहरणका लागि, हानिकारक उद्देश्यका लागि एआई प्रयोग गरी भ्रामक भिडियो वा तस्बिर, राजनीतिक वा सार्वजनिक व्यक्तित्वहरूका रणनीतिक रूपमा हानिकारक वा गैर-सहमतिको व्यक्तिगत प्रकृतिका सामग्री सिर्जना गर्नेसम्बन्धी समस्याहरू समाधान गर्न) अनुसन्धान समावेश हुन सक्छ।
यसैबीच, यस कागजातमा एक गुप्त भाग पनि छ जुन अमेरिकी राष्ट्रिय सुरक्षा मुद्दाहरूसँग सम्बन्धित छ। यसले सम्भवतः अन्य देशहरूलाई एआई र महत्वपूर्ण प्रविधिहरूमा फाइदा नउठाउनका लागि तिनीहरूविरुद्ध अपनाइने विभिन्न विधिहरूको चर्चा गरेको छ।
रक्षा र सुरक्षा क्षेत्रको कुरा गर्दा, ती कम्पनीहरू र स्टार्टअपहरू जो यस क्षेत्रमा पहिले नै आफुलाई प्रमाणित गरिसकेका छन्। यहाँ स्पष्ट रूपमा उनीहरूले फाइदा पाउनेछन्। विशेष गरी, पीटर थियेलको पलन्टिर, जसले FBI, US नागरिकता र आप्रवासन सेवा, NSA, पेन्टागन, CIA, US रक्षा कम्पनीहरूका लागि सम्झौताहरू सम्पन्न गर्यो र यसले इजरायल र युक्रेनलाई पनि आफ्नो उत्पादनहरू प्रदान गरेको छ।
त्यसैगरी, पेन्टागनले लामो समयदेखि आफ्नो लडाकू क्षमतामा कृत्रिम बुद्धिमत्ता समावेश गराउने कार्य गर्दै आएको छ। जुन अमेरिकी दक्षिणी कमान्डसँग माईक्रोसफ्टले विशेष क्लाउड सर्भरहरू निर्माण गर्न र कमान्ड र कन्ट्रोल प्रोग्रामहरुमा DALL-E एआई एप्लिकेसन प्रयोग गर्नको लागि गरेको सम्झौताद्वारा पुष्टि भएको छ।
त्यसकारण बाइडेनको हालको ज्ञापनपत्र भनेको पहिले देखि स्थापित प्रवृत्तिहरूको पुष्टि हो। जहाँ अमेरिकी गुप्तचर र सैन्यक्षेत्रमा अनुभव र क्षमता केही पहिले देखि नै कायम रहेको छ।
अनुवाद: मोहनप्रसाद ज्ञवाली
यात्रा र भूगोलको खोजमा: मध्ययुगका विद्वान र साहसीहरू
अन्तरीक्ष अभियानमा चीनको महान् छलाङ !
मरेपछि हाम्रो शरीरमा के हुन्छ ?
बिर्सनु उच्च बुद्धिमत्ताको संकेत हुन सक्ने !
चिक्सुलब क्रेटर: डायनोसर लोप गराइदिने भयानक घटनाको उपज
कसले पहिलो पटक पृथ्वीको मापन गरे?
संसारकै सबैभन्दा ठूलो होबा उल्कापिण्ड !
प्रतिक्रिया