जीवन भोक र सडक
कात्तिक २०, २०८१ मंगलबार १२:३६
जीवन संगै पछ्याउदै आयो
भोक
भोक जीवनको लागि थियो?
या जीवन भोकको लागि?
शायद भोक थिएन
जीवन थिएन ।
भोक शान्त पार्न
म निस्किएँ सडकमा
भोक मेटाउन बाटो चाहिन्छ
बाटोले नै मलाई
भोक मार्ने ठाउँसम्म पुर्याउँछ
म पछ्याउदै गएँ बाटो ।
अचानक गायव भयो बाटो
सुनसान जंगल भित्र ।
जंगल भित्र
अर्को डरलाग्दो भोक थियो
भोकले मलाई
लखेट्यो
म भागे।
जंगलै जंगल
जता जता भागें उतै बाटो बन्दै गयो
भोक संग भाग्नेहरू नै
बाटोका निर्माता थिए।
निकै टाढा छ भोक मेटाउने चारो
भाग्यो चारो मलाई देख्ने बित्तिकै।
म पछ्याइरहेछु चारो
चारो मदेखि टाढा भागिरहेछ
जीवन बचाउन।
म उसलाई लेखिटिहेछु
जीवन बचाउन।
भोकले बाटो बनायो
बाटोले सडक
सडक फराकिलो भयो
त्यही सडक भएर
फेरि
भोक बेच्ने ब्यपारीहरू आइरहेछन्।
भोक टाँसिएको छ नछुट्ने गरी
जीवन संग।
एक दिन भोक टुङ्गिने छ
सडक टुङ्गिने छ
जब जीवन टुङ्गिनेछ।
प्रतिक्रिया